بانگه‌وازی بۆ هه‌ڵوێست گرتن له‌ به‌رانبه‌ر ڕووداوی شیناوێ

داوا له‌ قوتابیان ده‌كرێت رۆژى شه‌ممه‌ ده‌وام نه‌كه‌ن

له‌ رۆژهه‌ڵاتى كوردستان ماته‌مینى گشتى راگه‌یه‌نرا و مامۆستایانى شارۆچكه‌ى پیرانشاریش داوا له‌ قوتابیان ده‌كه‌ن رۆژى شه‌ممه‌ ده‌وام نه‌كه‌ن.دواى ئه‌وه‌ى دوێنێ چوارشه‌ممه‌ كۆمه‌ڵێك چالاكوانى مه‌ده‌نى له‌ رۆژهه‌ڵاتى كوردستان داوایان كرد كه‌ ئه‌مڕۆ بكرێته‌ ماته‌مینى گشتى بۆ رێزگرتن له‌ قوربانیانى كاره‌ساتى سووتانى قوتابخانه‌ى شێناوێ. ئه‌مرۆ پێنج شه‌ممه‌ به‌ شێوازى جۆراو جۆر ئه‌و ماته‌مینییه‌ راگه‌یه‌نرا. مامۆستایانى شارى پیرانشار، به‌و بۆنه‌یه‌وه‌ به‌یاننامه‌یه‌كیان ده‌ركرد و ره‌خنه‌ له‌ وه‌زیرى په‌روه‌رده‌ى ئێران ده‌گرن، كۆپییه‌كى به‌یاننامه‌كه‌ بۆ (رووداو) نێردراوه‌ و تێیدا هاتووه‌ "له کاتێکدا خه‌می روودانی کاره‌ساتی قوتابخانه‌ی شیناوێی پیرانشار فه‌زای شاری ته‌نیوه، هه‌ڵوێسته‌کانی وه‌زیری په‌روه‌رده له چه‌ند رۆژی رابردوو دا، سه‌باره‌ت به کاره‌ساتی شیناوێ له مه‌جلیسی ئێران و به‌ره‌نگار بوونه‌وه‌ی له‌گه‌ڵ داواکاری نوێنه‌رانی کورد له مه‌جلیس سه‌باره‌ت به ده‌ست له‌کار کێشانه‌وه‌‌ی وه‌زیری په‌روه‌رده، بووه به مایه‌ی ناڕه‌زایه‌تی گشتی خه‌ڵک وهه‌موو لایه‌نه‌کان".هه‌ر له‌ باره‌ى وه‌زیرى په‌روه‌رده‌ى ئێران، له‌ به‌شێكى دیكه‌ى به‌یاننامه‌كه‌ هاتووه‌ "ئێمه وه‌ک مامۆستایان و چالاکانی مه‌ده‌‌نی شاری پیرانشار هه‌ڵوێسته‌کانی وه‌زیری په‌روه‌رده به وێنه‌ی خه‌مساردی و بێ مه‌سئولیه‌تی وه‌زیر له به‌رامبه‌ر روودانی کاره‌ساتی شیناوێ ده‌زانین و شه‌رمه‌زاری ده‌که‌ین".بۆ ده‌ربڕینى هاوخه‌مى و هاوسۆزى بۆ كه‌سوكارى قوربانیانى رووداوه‌كه‌ى شێناوێ، ئه‌و مامۆستایانه‌ له‌ به‌یاننامه‌كه‌دا داوا له خه‌ڵکی پیرانشار و گونده‌کانی ده‌وروبه‌رى ده‌كه‌ن "بۆ هاوخه‌می له‌گه‌ڵ بنه‌ماڵه‌ی قوربانیانی ئه‌و کاره‌ساته و پێشگیری له ئه‌گه‌ری روودانی کاره‌ساتی هاوشێوه له داهاتوودا رۆژی شه‌ممه‌ى داهاتوو رێككه‌وتنى 15/12/2012 ناره‌زایی گشتی و مه‌ده‌نی خۆیان به ن ه‌ناردنی منداڵان بۆ قوتابخانه‌کان ده‌ربڕن". چونكه‌ به‌ بڕواى ئه‌وان "رێکخستنی مانگرتنێکی به‌م چه‌شنه ده‌توانێت نیشانگه‌ری نارازی بوونی خه‌ڵک بێت سه‌باره‌ت به بارودۆخی ناله‌باری قوتابخانه‌کانی شاری پیرانشار و گونده‌کانی ده‌وروبه‌رى". ئێمه‌ وه‌ک یه‌کیه‌تی پیشه‌یی مامۆستایانی کوردستانی ئێران ده‌نگی خۆمان ده‌خه‌ینه‌ باڵ ئه‌و کۆده‌نگییه‌و داوا ده‌که‌ین قوتابیان و مامۆستایان له‌ ئاماده‌ بوون له‌ قوتابخانه‌کان له‌ رۆژی شه‌ممه‌دا خۆ ببوێرن، به‌ڵکو به‌و شێوازه‌ مه‌ده‌نیانه‌ ده‌نگی ناڕه‌زایی خۆمان به‌رانبه‌ر به‌م خه‌سار و که‌مته‌رخه‌مییه‌ی حکومه‌ت ده‌رببڕین.رێکكەوتی 2012/12/5، پۆلى قوتابیانى كچى پۆلى چواره‌مى سه‌ره‌تایى قوتابخانەی شۆڕشی گوندی شیناوێی پیرانشار، به‌هۆى ته‌قینه‌وه‌ى سۆباوه‌ ئاگرى تێبه‌ربوو.لەو رووداوەدا، 37 قوتابی و مامۆستای پۆلەکە ئاگریان تێبەربوو و هەندێک لە قوتابییەکان بەهۆی سەختی برینەکانیانەوە رەوانەی نەخۆشخانەکانی ورمێ، مەهاباد و تەورێز کران.ئەو رووداوە رای گشتی رۆژهەڵاتی کوردستانی هەژاند، بەشێوەیەک کە زۆربەی بەکاربەرانی فەیسبووک لە رۆژهەڵاتی کوردستان وێنەی پڕۆفایلەکانی خۆیان بۆ وێنەی ئەو کچانە و رووداوی ئاگرکەوتنەوەکە گۆڕی. یه‌کیه‌تی پیشه‌یی مامۆستایانی کوردستانی ئێران 7/12/2012