وتەیەک لەسەر بیمەی قوتابیانی شیناوێ بە هۆی کچ بوونیان:

من خۆم وەک کەسێک کە بە شانازییەوە یازدە ساڵ لە تەمەنم لە پیشەی پیرۆزی مامۆستایەتی لە شار و گووندەکانی کوردستان تێپەڕ بووە و بە شانازیشەوە و بە شایەدی هەموو ناسراوو هاوکاو و قوتابییەکان، توانیومە بە باشترین شێوە ئەرکی نیشتمانی خۆم بەجێ بێنم، ئەو کردەوە نگریسەی کۆماری ئیسلامی (کە هەڵبەت هەر کردەوەی وا لەو کۆمارە شەوپەرەستانە دەوەشێتەوە) مەحکوم دەکەم و داوا لە هەموو مامۆستا و هاوقەتارانم دەکەم بە هەر شێوەیەک بۆیان دەکرێت، بە دژی ئەو کردەوە دژە مرۆییە بوەستنەوە و مەحکومی بکەن، بە تایبەتی مامۆستایانی چالاکی شاری پیرانشار کە بە خۆشحاڵییەوە و بە گوێرەی ناسیاوی خۆم لە سەریان (وەک بەڕێوەبەری یەکیەتی پیشەیی مامۆستایانی کوردستانی ئێران)، مامستایانی شاری پیرانشار هەمیشە لە ریزی پێشەوەی نیشتمانپەروەری و بەرگری لە مافە پیشەیی و نەتەوایەتییەکان بوون، دەبێ دژ بەو کردەوە کۆماری ئیسلامییانەیە بوەستنەوە و بە نووسینی نامە و داواکاری و سەردانی بەرپرسان و لە ئەگەری پێویستدا، بە سازدانی کۆبوونەوەی هێمنانە ئەو کردەوەیە مەحکوم بکەن.
لە قوتابخانەدا، ڕەگەز واتای نییە و ئێمە هەموومان، قوتابیانمان بە یەک چاو چاو لێکردووە و دەیکەین،
کە ئاگرە نەگبەتەکەی شیناوێش بە هۆی کەمتەرخەمی ئەو نابەرپرسانە کەوتەوە، رەگەزی ئەو قوتابیانەی نەپرسی و دڕندانە تووشی ئەو قەیران و سووتماکەی کردنەوە، کەواتە هیچ یاسا و بنکەیەک و ئایینێک، بۆی نییە دوای ئەو هەموو گوێ پێنەدان و زۆر جار پێ ڕابواردنە و قەرەبوونەکردنەوەو گۆڕینی چارەنووسی ئەو پۆلە قوتابیە کە ئێستا ١٢ کەسیان سەرەڕای داوودەرمان، دەمووچاو و جەستەیان، چاک نەبۆتەوە و بە دەموو چاوی سووتاوەوە دیسان شانیان بەر شانی ژیان داوە و پشتیان بە هیوا بەستووە، ئەوان بە نیوە مرۆڤ پێناسە بکات و بەو بیانوویە، مافیان زیاتر لە جاران پێشێل بکات.
نەفرەت و ڕق و بێزاری لە هەر یاسایەکی مرۆڤ خاپێن و جیاوازیدانەر.
سڵاو لە قوتابیانی شیناێ
لە گەڵتانین لە هەر هەنگاوێ
هەڵمەت مەعرووفی